هەواڵ

وەزارەتی دارایی هەرێم 120 ملیار دیناری ڕادەستی وەزارەتی دارایی عێراق کرد

Mic
2025-07-22

وەزارەتی دارایی هەرێم 120 ملیار دیناری ڕادەستی وەزارەتی دارایی عێراق کرد و، د. فوئاد حوسێن-یش دەڵێت: ئەمڕۆ بەغدا مووچەی مانگی ئایاری فەرمانبەران و مووچە خۆرانی هەرێمی کوردستان خەرج دەکات.

وەزارەتی دارایی و ئابووریی حکومەتی هەرێمی کوردستان ڕایگەیاند: بەشی گەنجینەی فیدراڵی لەداهاتی نانەوتی هەرێم خرایە سەر هەژماری بانکی وەزارەتی دارایی فیدراڵ لە لقی هەولێری بانکی ناوەندی عێراق؛ کە بڕەکەی (120) ملیار دینارە.

لەبارەی مووچەی مانگی ئایار د. فوئاد حوسێن، وەزیری دەرەوەی عێراق بە کەناڵی ڕووداوی ڕاگەیاندووە، لێکتێگەیشتن هەیە و کێشەی مووچەی مانگی ئایار چارەسەر کراوە، بڕیارە ئەمڕۆ خەرج بکرێت.

بەپێی زانیارییەکانی دیجیتاڵ میدیای MIC لە دوو ڕۆژی ڕابردوودا لیژنەیەکی هەرێمی کوردستان تەرازووی پێداچوونەوەی مانگی ئایار و حوزەیرانی ڕادەستی وەزارەتی دارایی عێراق کردووە.

بەپێی دواین پەرەسەندنەکانی نێوان بەغدا و هەولێر؛ مووچەی مانگەکانی حوزەیران و تەمموز بەستراوەتەوە بە هەناردەکردنەوەی نەوتی هەرێمی کوردستان لە ڕێگەی کۆمپانیای سۆمۆ، بەڵام هێرشە درۆنییەکان ئاستی بەرهەمهێنانی نەوتیان لە کێڵگەکانی هەرێم لە 280 هەزار بەرمیل بۆ 80 هەزار بەرمیلی ڕۆژانە کەمکردوەتەوە، ئەمەش بەربەستە لەبەردەم جێبەجێکردنی لێکتێگەیشتنەکەی هەولێر و بەغدا.

بۆ هەڵسەنگاندنی ئاستی زیانەکان و دابەزینی توانای بەرهەمهێنانی نەوت لە کێڵگە نەوتییەکانی هەرێمی کوردستان، شاندێکی وەزارەتی نەوتی عێراق هاتنە هەرێم و ڕاپۆرتێکیان لەسەر زیانەکان گەڵاڵە کرد و گەڕانەوە بەغدا.

بۆ خەرجکردنی مووچەی مانگەکانی حوزەیران و تەمموز هەرێمی کوردستان چاوەڕێی حکومەتی فیدراڵە، لەسەر بنەمای ئەنجامی ڕاپۆرتەکەی وەزارەتی نەوت بڕیار لە خەرجکردنی مووچەی ئەو دوو مانگە بدات.

زیاتر لە 80 ڕۆژ بەسەر دابەشکردنی وادەی مووچەی مانگی ئایار تێپەڕیوە و فەرمانبەران و مووچەخۆرانی هەرێمی کوردستان لە دۆخێکی سەختی دارایی-دان؛ داوا دەکەن پرسی مووچە لە ململانێ سیاسییەکان دەربهێندرێت و، نەکرێتە کەرەستەی سیاسی و ململانێ نێوان حکومەتی هەرێم و فیدراڵ.

بابەتی لێکچو

More News

Most Popular

هەواڵ

بەهۆی پرۆژەیەکی دامەزراوەی ڤیژنەوە چەند سەرمایەدارێک کۆمەکی دارایی پێشکەشی نەخۆشخانەی هیوا دەکەن

Mic
2025-07-24


دوای ئیڤێنتێکی دامەزراوەی ڤیژن بۆ لێکۆڵینەوەی ستراتیژی لەسەر رەوشی کەرتی تەندروستی لە سلێمانی و ئاشکراکردنی کەموکوڕییەکانی نەخۆشخانەی هیوا، چەند سەرماییەدارێک لەسەر ئەرکی خۆیان پێداویستییەکاننیان دابینکرد

ئەمڕۆ پێنجشەممە، چەند سەرمایەداريکی شاری سلێمانی بڕیاریاندا کە ئەرکی چاککردنەوەی ئامێری تیشکی (MRI) نەخۆشخانەی هیوا بگرنە ئەستۆ، ئەوەش دوای ئەوەی د. یاد نەقشبەندی ـ بەڕێوەبەری نەخۆشخانەکە لە ئیڤێنتێکی دامەزراوەی ڤیژن دا باسیلەوەکرد کە ئامێرەکە لەکارکەوتتوە و بەهۆی نەبوونی بودجەوە چاک نەکراوەتەوە.

سەرمایەدار جەمالی حاجی علی و بازرگانانی بازاری شەوکەتی مەلا ئەرکی چاککردنەوەی ئامایرەکەیان لە ئەستۆ گرتووە کە ٢٦٥ ملیۆن و ٧٥٠ هەزار دینارە.

شەممەی رابردوو دامەزراوەی ڤیژن بۆ لێکۆڵینەوەی ستراتیجی، سیمینارێکی بە ناونیشانی "کەرتی تەندروستی لەنێوان ئاڵنگارییەکان و دەرفەتەکانی گەشەسەندندا" ريکخست کە تێیدا سەباح هەورامی بەڕێوەبەری گشتی تەندروستیی سلێمانی چەندین ئامار و داتای پەیوەست بە کەرتی تەندروستی خستەڕوو. هاوکات د. یاد نەقشبەندی، بەڕێوبەری نەخۆشخانەی هیوا باسی لە گرفتەکانی بەردەمیان کرد .

یەکێک لە کێشەکانی نەخۆشخانەکەش لەکارکەوتنی ئامێری تیشک بوو کە بەهۆیەوە هەزاران نەخۆش ناچاربوون روو لە تاقیگو ئەهیلیەکان بکەن.

دامەزراوەی ڤیژن لە چوارچێوەی پڕۆژەی چاوی کراوەدا بانگهێشتی بەرپرسانی باڵای حکومەت دەکات، بۆ خستنەڕووی داتا و زانیاریەکان لە کەرتە جیاوازەکاندا، بە ئامانجی رەخساندنی شەفافیەت و بەشداری زیاتری هاوڵاتیان و گەشەپێدانی هەرێمی کوردستان.

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved