هەواڵ

دادگای فیدراڵی سکاڵاکانی بۆ هەڵوەشاندنەوەی پەرلەمانی کوردستان رەتکردەوە

دادگای فیدراڵی ئەو دوو سکاڵایەی رەکردەوە کە داوای هەڵوەشاندنەوەی خولی شەشەمی پەرلەمانی کوردستانیان دەرکرد، یەکێک لە سکاڵاکارەکان دەڵێت، بە پاساوی نەبوونی پسپۆڕی سکاڵاکان رەتکراونەتەوە.

عومەر گوڵپی کاندیدی سەرکەوتووی کۆمەڵی دادگەری کوردستان کە یەکێک بوو لەو کەسانەی سکاڵای بۆ هەڵوەشاندنەوەی پەرلەمانی کوردستان کردبوو رایگەیاند، بە پاساوی نەبوونی پسپۆڕی دادگای فیدراڵی سکاڵاکانی رەتکردونەتەوە. 

دوو سکاڵا لە دادگای فیدراڵی بۆ هەڵوەشاندنەوەی پەرلەمانی کوردستان تۆمارکرابوون، سکاڵایەکییان لەلایەن سروە عەبدولواحید، کاوە عەبدولقادر و کوردەوان جەمال لە فراکسیۆنی نەوەی نوێ لە پەرلەمانی عێراق و کوردستان و عومەر گوڵپی کاندیدی سەرکەوتووی کۆمەڵەی دادگەری بۆ پەرلەمانی کوردستان تۆمارکرا بوون. 

نەوەی نوێ لە سکاڵاکەیەدا کە دژی سەرۆکی هەرێمی کوردستان تۆمارییان کردبوو، داوایان لە دادگاکە کردبوو، بەهۆی هەڵنەبژاردنی دەستەی سەرۆکایەتی پەرلەمان و متمانە نەدان بە ئەنجومەنی وەزیران خولی شەشەمی پەرلەمانی کوردستان هەڵبوەشێنێتەوە. 

نەوەی نوێ لە سکاڵاکەیەدا پشتی بە یاسای سه‌رۆكایه‌تی هه‌رێمی كوردستان ــ عێراق یاسای ژماره‌ (1) ی  ساڵی/ 2005 (1) و هەموارەکانی بەست بوو، کە لە خاڵی سێیەمی بڕگەی چوارەمی مادەی دەیەمدا هاتووە، له‌م حاڵه‌تانه‌دا به‌ فه‌رمانێ په‌رله‌مانی كوردستان ــ عێراق هه‌ڵده‌وه‌شێنێته‌وه‌، ئه‌گه‌ر په‌رله‌مان متمانه‌ی به‌ئه‌نجومه‌نی وه‌زیران، له‌ سێ پێكهاته‌ی وه‌زاری جیاوازی یه‌ك له‌دوای یه‌كدا نه‌دا.

کۆمەڵی دادگەری لە سکاڵاکەیەدا کە دژی سەرۆکی هەرێم و سەرۆکی تەمەنی پەرلەمانی کوردستان تۆماریی کردبوو داوای هەڵوەشاندنەوەی پەرلەمانی کوردستان، گەڕانەوەی هەموو ماف و ئیمتیازاتەکان لەلایەن ئەو 97 کاندیدەی کردبوو کە سوێندی یاساییان خواردووە، هەروەها داوای پابەندکردنی کۆمسیۆنی باڵای سەربەخۆی هەڵبژاردنەکانی عێراق بۆ ئامادەکاری و ئەنجامدانی هەڵبژاردن بۆ پەرلەمانی کوردستان بە زووترین کات کردبوو. 

کۆمەڵی دادگەری لە سکاڵاکەیدا پشتی بە بڕگەی چوارەمی مادەی دەیەمی یاسای سه‌رۆكایه‌تی هه‌رێمی كوردستان ــ عێراق یاسای ژماره‌ (1) ی  ساڵی/ 2005 (1) و هەموارەکانی بەست بوو، کە لە خاڵی دووەمدا هاتووە،  ئه‌گه‌ر له‌ماوه‌ی (45) چل و پێنج رۆژدا له‌بانگهێشت كردنی بۆ كۆبوونه‌وه‌ی خولی هه‌ڵبژاردن، ژماره‌ی یاسایی ئه‌ندامان به‌ده‌ست نه‌هات، به‌ فه‌رمانێ په‌رله‌مانی كوردستان ــ عێراق هه‌ڵده‌وه‌شێنێته‌وه‌. 

رۆژی 2ی کانوونی یەکەمی 2024، خولی شەشەمی پەرلەمانی کوردستان دەرگاکانی بۆ پێشوازیکردن لە پەرلەمانتاران کردەوە، کرانەوەی دەرگاکانی پەرلەمان بەڕوی پەرلەمانتاراندا، بۆ تاتوێکردنی پرسە هەنوکەیی و پێشهات و گۆڕانکارییەکان نەبوو، بەڵکو تەنها بۆ سوێندخواردنی پەرلەمانتارانی خولی شەشەمی پەرلەمان بوو.

پەرلەمانی کوردستان لەو کاتەوە، دەرگاکانی بۆ هیچ دانیشتنێک نەکراونەتەوە و دیاریش نییە کەی کارا دەبێتەوە و دەتوانێت چالاکییەکانی دەستپێبکاتەوە.

هەواڵ

وابڕوات فریا ناکەون.. پارتی و یەکێتی دەیانەوێت پێش هەڵبژاردنی عێراق حکومەت پێکبهێنن

دوای زیاتر لە نۆ مانگ لە هەڵبژاردنی پەرلەمانی کوردستان، پارتی و یەکێی وادەی پێکهێنانی کابینەی نوێ رادەگەیەنن، بەڵام هیچ هەنگاوێکی کردەیی نەنراوە بۆ کۆبونەوەی ئەو دوو حزبە و رێککەتن لەسەر پێکهێنانی حکومەت.

دوو مانگە کۆبونەوەکانی یەکێتی و پارتی بۆ گفتوگۆکردن لەسەر پێکهێنانی حکومەت وەستاوە، جیاوازی تێڕوانینی هەردوولا بۆ دابەشکردنی پۆستەکان هۆکاری رێکنەکەوتنیانە بۆ پێکهێنانی حکومەت.

یەکێتی پرۆژەیەکی بۆ دابەشکردنی پۆستەکان خستووەتە بەردەم پاتی، کە تێیدا پۆستەکانی پۆلێن کردووە بۆ سەرۆکایەتییەکان، وەزارەتە سیادییەکان، وەزارەتە خزمەتگوزارییەکان و دەستە و فەرمانگەکان، لەبەرامبەردا پارتی دەیەوێت بەپێ بەرکەوتەی هەڵبژاردن بێت و رازینییە بە پرۆژەکەی یەکێتی.

رۆژی 8ـى نیسان، نێچیرڤان بارزانی، سەرۆکی هەرێمی کوردستان وتی: "گفتوگۆی ئێمە بۆ ئەوەیە بەزووترین کات حکومەت پێکبهێندرێت، هیچ نییەتێک نە لەلایەن ئێمە نە لەلایەن یەکێتییەوە بۆ دواخستنی پێکهێنانی حکومەت نییە".

زیاتر لە سێ مانگ بەسەر قسەکانی نێچیرڤان بارزانیدا تێپەڕیوە، کە لە هەمانکاتدا جێگری سەرۆکی پارتییە، بەڵام هیچ ئاسۆکی روون نییە بۆ پێکهێنانی حکومەت، بەپێی زانیارییەکان، هیچ وادەیەکی نوێ بۆ کۆپبونەوەی پارتی و یەکێتی لەسەر پێکههێنانی حکومەت دیاری نەکراوە.

رۆژی 19ـى تەمموز، لەمیانی کۆبونەوەی لەگەڵ بباڵیۆزی ئەمریکا لە عێراق، مەسرور بارزانی سەرۆکی حکومەتی هەرێم رایگەیاند، پێویستە کابینەی نوێی حکومەتی هەرێمی کوردستان پێش هەڵبژاردنی پەرلەمانی عێراق پێکبهێنرێت.

هەروەها رۆژی 24ـى تەمموز، بافڵ تاڵەبانی، سەرۆکی یەکێتیی نیشتمانیی کوردستان لە میانی کۆبونەوەی لەگەڵ یان برێم، کونسوڵی گشتیی فەڕەنسا لە هەرێمی کوردستان رایگەیاند، هەموو هەوڵەکانیان بەو ئاڕاستەیەن کە حکومەتی نوێ پێش هەڵبژاردنی عیراق پێکبهێنین.

وابڕارە رۆژی 11ـى 11ـى ئەمساڵ هەڵبژاردنی پەرلەمانی عێراق ئەنجامبدرێت، لە ئێستادا سێ مانگی ماوە، لەگەڵ ئەوەی پارتی و یەکێتی هەنگاوی کردەییان نەناوە بۆ پێکهێنانی حکومەت، رێکارەکانی کۆبونەوەی پەرلەمان و هەڵبژاردنی دەستەی سەرۆکایەتی پەرلەمان و رێکارەکانی پێکهێنانی حکومەت زیاتر لە دوو مانگی پێویستە.