هەواڵ

داهاتی دانەگاز لە نیوەی یەکەمی ئەمساڵ 171 ملیۆن دۆلارە

کۆمپانیای دانەگاز ڕاپۆرتی نیوەی یەکەمی ئەمساڵی بڵاوکردەوە و دەڵێت، ئاستی بەرهەمهێنانیان لە بەرزیدا ماوەتەوە و بەرهەمهێنان لە کێڵگەی كۆرمۆر لە رۆژێکدا 500 ملیۆن پێی سێجا غازی تێپەڕاندووە.

داهاتی کۆمپانیاکە لە نیوەی یەکەمی ئەمساڵ 171 ملیۆن دۆلار بووە، لە چارەکی یەکەمی ئەمساڵ سەرقاڵ نۆژەنکردنەوە و بەرزکردنەوەی ئاستی بەرهەمهێنان بوون.

لە ئێستادا دانەگاز سەرقاڵی پەرەپێدانی پڕۆژەی کێڵگەی کۆرمۆرە، کە بە کۆرمۆر 250ناسراوە، کۆمپانیاکە دەڵێت: پڕۆژەکە زوتر لەوادەی خۆی تەواو دەبێت، کارەکان بەخێرایی بەڕێوە دەچن.

هەر بەگوێرەی ڕاپۆرتی کۆمپانیاکە، ئەگەر پڕۆژەی پەرپێدانی کێڵگەی کۆرمۆر تەواو ببێت، ئاستی بەرهەمێنانی گاز لە کۆمپانیاکە بەڕێژەی 50% بەرزدەبێتەوە.

لەبارەی کێڵگەی چەمچەماڵ، دانەگاز ئەوەی خستوەتەڕوو، وەک ئەوەی پێشتر ڕاگەیەندرا، ئەم ساڵ 160 ملیۆن دۆلار وەبەرهێنانیان کردووە لەو کێڵگەیەدا، ئامانجی سەرەتاییان بەرهەمهێنانی رۆژانە 75 ملیۆن پێی سێجا گازی سرووشتییە.

دانە گاز دەڵێت، بەراورد بە 2017 قەبارەی بەرهەمهێنانی گاز لەلایەن کۆمپانیاکەوە 75% بەرزبووەتەوە.

هەواڵ

ڕێککەوتنی هەولێر و بەغدا لەسەر مووچە کێشەی تێکەوتوە

ڕێککەوتنی هەولێر و بەغدا کێشەی نوێی بۆ دروستبووە و چوار خاڵی ناکۆک لەنێوان هەردوو حکومەت ناردنی مووچەی دواخستووە، فەرمانبەران و مووچەخۆرانیش رۆژەکان دەبژێرن بۆ وەرگرتنی مووچە.

لە ناوەڕاستی مانگی ڕابردوو هەولێر و بەغدا لێکتێگەیشتنێکی گشتگیریان واژۆکرد، ئێستا میکانیزمی جێبەجێکردنی ڕێککەوتنە بووەتە کێشە و مووچەی ڕاگرتووە.

بەپێی زانیارییەکانی دیجیتاڵ میدیای MIC یەکێک لە خاڵە ناکۆکەکان میکانیکی ناونانی هەناردەکردنی نەوتە، بەغدا ناوی ڕادەستکردنی لێناوە و هەرێم ڕازینییە و دەڵێت، هەناردەکردنە نەک ڕادەستکردن.

ناکۆکییەکی دیکە ئەوەیە بەغدا داوای داهاتی پاڵاوتنی بڕی نەوتی ناوخۆ واتە 50 هەزار بەرمیلەکە دەکات و هەولێر ڕازی نییە، هەروەها عێراق داوای هەموو داهاتی ناوخۆ دەکات و هەرێم دەڵێ نەخێر نیوەی داهاتە فیدراڵییەکانتان دەدەینێ.

یەکێکی دیکە لەو کێشانەی بەلای هەرێمی کوردستانەوە ئەساسییە کاتی خەرجکردنی مووچەیە، هەولێر دەڵێت لە کاتی خۆی مووچە بنێرن بەغدا ڕەتی دەکات و دەڵێت، تا نەوت و داهاتی ناوخۆ ڕادەست نەکەن مووچە نییە.

ئەم چوار خاڵە بوونەتە هۆی راگرتنی مووچە و نەناردنی لەلایەن حکومەتی عێراقەوە، مووچە خۆران و فەرمانبەرانی هەرێمی کوردستان-یش لە چاوەڕوانیدا ڕۆژەکان دەژمێرن، تا ئەم خاڵە ناکۆکانەش چەرەسەر نەکرێت ناردنی مووچە ئەستەم دەبێت. 

ئەوە لە کاتێکدایە، نزیکدەبینەوە لە ناوەراستی مانگی ئاب، هێشتا فەرمانبەران و مووچە خۆرانی هەرێمی کوردستان مووچەی مانگەکانی حوزەیران و تەمموزیان وەرنەگرتووە و دیاریشنییە کەی وەری دەگرن.

بەپێی دوایین ڕێککەونی نێوان هەولێر و بەغدا، لەبەرامبەر ناردنی مووچە لە عێراقەوە دەبێت هەرێمی کوردستان، ڕۆژانە 230 هەزار بەرمیل نەوت بە عێراق بدات و مانگانەش لە داهاتی ناوخۆ 120 ملیار دینار بخاتە سەر هەژماریی وەزارەتی دارایی عێراق.