هەواڵ

وەزارەتی دارایی مووچەی ئەوانە رادەگرێت کە تا هەفتەیەکی دیکە فۆڕمی " هەژماری من" پڕ ناکەنەوە

فەرمانبەران و مووچەخۆرانی هەولێر تەنها هەفتەکەیان لە بەردەست ماوە بۆ پڕکردنەوەی فۆڕمی "هەژماری من"، وەزارەتی دارایی دەڵێت، ئەوەی پڕی نەکاتەوە مووچەکەی رادەگرن. 

وەزارەتی دارایی و ئابوری هەرێمی کوردستان لە نوسراوێکدا کە ئاڕاستەی یەکە ژمێرکارییەکانی هەولێری کردووە و کۆپیەکی دەست دیجتاڵ میدیای MIC کەوتووە، 27ـی ئایاری وەک دوایین وادە بۆ دابەشكردنی مووچە بەشێوەی نەختینەییی دیاریی کردووە.

لەبارەی ئەو فەرمانبەر و مووچەخۆرانەی تا ئێستا فۆڕمی "هەژماری من"یان پڕنەکردوەتەوە ، لە نوسراوەکەی وەزارەتی دارایی و ئابورییدا هاتووە، لە دوای ئەو بەروارەوە ناتوانن مووچە وەربگرن.

بەشێک لە مووچەخۆران و فەرمانبەران هەموو رێکارەکانی "هەژماری من"یان تەواو کردووە، بەڵام کارتی بانکیان وەرنەگرتوتەوە، وەزارەتی دارایی ئاماژەی بۆ ئەوەکردووە، پێویستە تا هەفتەیەکی دیکە کارتەکانیان وەربگرن.

وەزارەتی دارایی و ئابوری، رێکارەکانی بە بەشێک لە هەوڵەکانی حکومەتی هەرێمی کوردستان بۆ گواستنەوەی هەرێمی کوردستان بۆ سیستمێکی دیجتاڵی، بۆیە ئەوە دوایین ئاگادارکردنەوە دەبێت.

لە پارێزگای هەولێر نزیکەی 163 هەزار فەرمانبەر خاوەنی هەژماری بانکین و بەشێوەیەکی دیجیتاڵی مووچە وەردەگرن، بەپێی داتاکانی وەزارەتی دارایی و ئابوری تەنها 4 هەزار و 500 فەرمانبەر مووچەکانیان نەکراوە بە دیجتاڵی کە لەو ژمارەیە 2 هەزار و 400 فەرمانبەرییان خۆیان لە "هەژماری من" تۆمارنەکردووە و 2 هەزار و 100 فەرمانبەریشیان خۆیان تۆمارکردووە، بەڵام کارتی بانکیان وەرنەگرتووەتەوە . 

نوسراوەکەی وەزارەتی دارایی و ئابوری هەرێمی کوردستان تەنها بۆ پارێزگای هەولێرە، بەڵام رێکارەکان وەرگرتنی فۆڕمی "هەژماری من"ـی لە سلێمانی گەرم کردووە، بەشێوەیەک رۆژانە دەیان هاوڵاتی پێکەوە سەردانی بانکەکان دەکەن تا فۆڕمی پڕۆژەکە پڕ بکەنەوە. 

هەواڵ

پارێزگاری کەرکووک لا دەبرێت؟… هاوپەیمانییە پێکهێنەرەکەی ئیدارەی کەرکووک دەبێتە کەمینە

دوو ئەندامی عەرەبی ئەنجومەنی پارێزگای کەرکووک بە بیانووی " جێبەجینەکردنی رێککەوتن" لە هاوپەیمانیی پێکهێنانی ئیدارەی کەرکووک کشانەوە و هاوپەیمانێتییەکە بووە کەمینەی ئەنجومەنی پارێزگا. بەپێی یاسا زۆرینەی رەهای ئەندامان دەتوانن حکومەتی خۆجێی پارێزگاکان هەڵبوەشێننەوە. 

 
هەریەک لە رەعد ساڵح و شێخ زاهر ئەنوەر عاسی، کە دوو ئەندامی عەرەبی ئەنجومەنی پارێزگای کەرکووکن، بە بیانووی "جێبەجێنەکردنی رێککەوتنی پێکهێنانی حکومەتی خۆجێی" کشانەوەی خۆیان لە هاوپەیمانێتی پێکهێنانی ئیدارەی نوێی پارێزگای کەرکووک راگەیاند.

زیاتر لە 9 مانگە حکومەتی خۆجێیی کەرکووک پێکهێندراوە،بەڵام ئەو دوو ئەندامەی دەستلەکارکێشاوەیە لە کۆنگرەیەکی رۆژنامەوانیدا رایانگەیاند، "ئێمە جیدیبوونمان لە جێبەجێکردنی رێککەوتنی سیاسی بەدینەکردووە".

تائێستا پێنج ئەندامی عەرەبی و دوو ئەندامی پارتی دیموکراتی کوردستان و دوو نوێنەری بەرەی تورکمانی بایکۆتی کۆبوونەوەکانی ئەنجومەنی پارێزگای کەرکووکیان کردووە.

بە کشانەوەی ئەو دوو ئەندامەی ئەنجومەنی پارێزگای کەرکووک ژمارەی ئەو ئەندامانەی بایکۆتی دانیشتنەکانیان کردووە بووە 9 ئەندام لە کۆی 16 ئەندام.

ئێستا بەرەی بایکۆت زۆرینەی ئەنجومەنی پارێزگای کەرکووک پێکدەهێنن، ژمارەی ئەندامانی هاوپەیمانی پێکهێنەری ئیدارەی نوێی پارێزگاکە بووەتە 7 ئەندام.

ئەنجومەنی پارێزگای کەرکووک هەڵدەوەشێتەوە؟ 
بەپێی یاسای ئەنجومەنی پارێزگاکانی عێراق زۆرینەی ڕەهای کۆی ئەندامانی ئەنجومەنی پارێزگاکان دەتوانن حکومەتی خۆجێی پارێزگاکان پێکبهێنن و هەڵیشی بوەشێننەوە.

دیجیتاڵ میدیای Mic قسەی لەگەڵ بەشێک لەو ئەندامانە کردووە کە بایکۆتی دانیشتنەکانیان کردووە، ئەوان رەتیانکردەوە کە هیچ پلانێکیان بۆ هەڵوەشاندنەوەی ئیدارەی پارێزگای کەرکووک هەبێت.

ئەگەرچی لە ماوەی رابردوو پارتی دیموکراتی کوردستان بەشداریکردنی لە حکومەتی خۆجێی کەرکووک رەتکردبووەوە، بەڵام ناوەڕاوستی ئەم مانگە 8 ساڵ دوای رووداوەکانی 16ی ئۆکتۆبەر، پارتی دیموکراتی کوردستان یەکەم پۆستی ئیداری لە پارێزگای کەرکووک وەرگرتەوە. 

دکتۆر شاسوار باوەیی، لەسەر پشکی ئەو حیزبە وەک یاریدەدەری بەڕێوەبەری گشتیی تەندروستیی کەرکووک دەستبەکاربوو، ئەمەش وەک هەنگاوێکی سەرەتایی بۆ گەڕانەوەی ئەو حزبە بۆ ناو ئیداریی شارەکە دادەنرێت.

هەڵبژاردنی پارێزگاری کەرکووک

ڕۆژی 10ـی ئابی 2024، لە هۆتێل ڕەشیدی شاری بەغداد، بە ئامادەبوونی وەزیری دادی عێراق، كۆبوونەوەی ئەنجومەنی پارێزگای كەركوك بە بەشداری 9 ئەندام لە كۆی 16 ئەندام بەڕێوەچوو و تێیدا ڕێبوار تەها وەك پارێزگار و محەمەد حافز وەك سەرۆكی ئەنجومەنی پارێزگا هەڵبژێردران.

دواتر پارتی، بەرەی تورکمانی و بەشێکی پێکهاتەی عەرەب، کۆبوونەوەکەیان بە نایاسایی ناوبرد و ڕاکان جبوری وەک لایەنە عەرەبیە ناڕازییەکان و حەسەن توران سەرۆکی بەرەی تورکمانی لە دادگای فیدراڵی سکاڵای یاساییان تۆمارکرد، بەڵام دادگا سکاڵاکانی رەتکردەوە. 

هاوپەیمانی سیادەش وەک هەڵوێستیێک، محەمەد حافز سەرۆکی ئەنجومەنی پارێزگای کەرکووکی لە هاوپەیمانێتیەکەی دورخستەوە و ڕایگەیاند، پابەندی سیاسەتی پارتەکە نەبووە و بەشداری کۆبوونەوەی ئەنجومەنی پارێزگای کردوە.

هه‌ڵبژاردنی ئه‌نجومه‌نی پارێزگای كه‌ركوك
دوای 18 ساڵ تێپه‌ڕینی به‌سه‌ر یه‌كه‌م هه‌ڵبژاردنی ئه‌نجومه‌نی پارێزگای كه‌ركوكدا، ڕۆژی 18ـی كانونی یه‌كه‌می 2023، له‌ چوارچێوه‌ی هه‌ڵبژاردنی ئه‌نجومه‌نی پارێزگاكانی عێراقدا، له‌ پارێزگای كه‌ركوك هه‌ڵبژاردن به‌ڕێوه‌چوو.

له‌ هه‌ڵبژاردنه‌كه‌دا، له‌ سنوری كه‌ركوك، 871 هه‌زار كه‌س مافی ده‌نگدانی هه‌بوو بۆ هه‌ڵبژاردنی 16 نوێنه‌ر. كۆی گشتی 248 كه‌س خۆیان كاندید كردبوو، 318 بنكه‌ش بۆ ده‌نگدان ته‌رخان كرابوو.

بەپێی ئەنجامی هەڵبژاردنی ئەنجومەنی پارێزگای کەرکووک، کورد 7 کورسی، عەرەب 6 کورسی، تورکمان 2 کورسی و کوتلەی بابلیۆنیش کورسیی کۆتای لەکۆی 16 کورسییەکەی ئەنجومەنی پارێزگای کەرکووک بەدەستهێناوە.