هەواڵ

دەستلەکارکێشانەوەی ئەندامانی دادگای باڵای فیدراڵی کێشە بۆ هەڵبژاردنی پەرلەمانی عێراق دروست دەکات

Mic
2025-06-21


دەستلەکارکێشانەوەی ئەندامانی دادگای باڵای فیدراڵی عێراق هەڕەشە لە بەڕێوەچوونی هەڵبژاردنی پەرلەمانی عێراق دەکات، وەک ئەوەی بڕیارە لە کۆتایی ئەمساڵدا ئەنجام بدرێت، ئەمەش بە لەبەرچاوگرتنی پاڵپشتی یاسایی دوای ڕاگەیاندنی ئەنجامەکان.

رۆژی 19ـى حوزەیرانو شەش ئەندامی سەرەکی و سێ ئەندامی یەدەکی دادگای باڵای فیدراڵی عێراق دەستیان لەکارکێشایەوە، میدایاکانی عێراق هۆکارەکەیان بۆ داوایەکی سەرۆکی دادگاکە گێڕایەوە لە دەسەڵاتدارانی عێراق.

وەک میدیا عێراقییەکان ئاماژەیان پێکردووە، جاسم عەبود، سەرۆکی دادگای باڵای فیدراڵی عێراق داوای لە دەسەڵاتدارانی عێراق کردووە،  کۆبوونەوەیەک بۆ یەکلاکردنەوەی دۆسیە مشتومڕاوییەکانی نێوان دادگای تەمیز و دادگای فیدراڵی رێکبخەن، ئەمەش ناڕەزیەتی ئەو نۆ دادوەرەی لێکەوتووەتەوە.

رۆژنامەی شەرقولئەوسەت بڵاویکردەوە، دەستلەکارکێشانەوەی ئەندامانی دادگای باڵای فیدراڵی هۆکارەکە ناکۆکی بووە لە نێوان سەرۆکی دادگای باڵای فیدراڵی و دادوەر فایق زیدان، سەرۆکی ئەنجومەنی باڵای دادوەری.

شەرقولئەوسەت  ئاشکرای کردووە، هاوپەیمانی چوارچێوەی هەماهەنگیی دەسەڵاتدار هەوڵدەدات دۆخی سیاسی ناوخۆیی کۆنتڕۆڵ بکات و پێش بە هەر هەڵکشانێکی زیاتر بگرێت، بەتایبەتی بە لەبەرچاوگرتنی کاردانەوەی رووبەڕووبوونەوەی ئێستای نێوان ئێران و ئیسرائیل.

سەرچاوە ئاگادارەکان بۆ شەرقولئەوسەت باسیان لەوە کردووە کە هێزەکانی ناو "چوارچێوە" ترسیان لە کاردانەوەی ئەو بۆشاییە هەیە، کە بەهۆی دەستلەکارکێشانەوەی ئەندامانی دادگای فیدراڵییەوە دروست بووە.

باسیل حسێن، سەرۆکی سەنتەری کلواز بۆ لێکۆڵینەوەی سیاسی بە شەرقولئەوسەتی راگەیاند، باشترین ڕێگە بۆ چارەسەرکردنی کێشەکە پابەندبوونە بە بڕگەکانی دەستور و کارکردن بۆ دەرکردنی یاسایەک بۆ دادگای باڵای فیدراڵی، کە لەگەڵ مەرجە دەستوورییەکاندا بگونجێت.

 محەمەد سەلمان تائی، ئەندامی پێشووی پەرلەمانی عێراق بە پێویستی دەزانێت، لێک تێگەیشتن بکرێت لەگەڵ دادوەرە دەستلەکارکێشاوەکان و کشانەوەی دەستلەکارکێشانەوەکانیان و هۆشداریشیدا لەوەی وڵاتەکە ڕەنگە خۆی بخزێنێتە ناو قەیرانێکی سیاسی بێ وێنەیەوە.

رۆژنامەی شەرقولئەوسەت ئاماژەی بەوەکردووە، دەستلەکارکێشانەوەی زۆرینەی ئەندامانی دادگای فیدراڵی کێشە بۆ هەڵبژاردنی پەرلەمانی عێراق دروست دەکات، بەو پێیەی ئەگەر  پێش هەڵبژاردن کێشەکانی دادگاکە چارەسەر نەکرێن، ئەوا دادگای باڵای فیدراڵی ناتوانێت ئەنجامی هەڵبژاردن پەسەند بکات.

بەپێی دەستووری عێراق، دەبێت هەموو هەڵبژاردنەکانی عێراق پاش راگەیاندنی و یەکلایی بوونەوەی سکاڵاکان، لەلایەن دادگای باڵای فیدراڵییەوە پەسەند بکرێت.

وابڕیارە رۆژی 11ـى 11ـی ئەمساڵ، هەڵبژاردنی پەرلەمانی عێراق بەڕێوەبچێت، کۆمسیۆن بەردەوامە لە ئامادەکارییەکانی و لە ئێستادا ئامادەکاری دەکات بۆ وەرگرتنی ناوی لیستی کاندیدی لایەنەکان.

بابەتی لێکچو

More News

Most Popular

هەواڵ

چی روویدا؟ ئەمریکا هێرشی کردە سەر ئێران

Mic
2025-06-22

ئەمریکا بۆ پشتیوانیکردنی ئیسرائیل هێرشی کردە سەر بنکە ئەتۆمییەکانی ئێران، ئێستا هەڵوێستی تاران یەکلایی کەرەوەیە و هەنگاوەکانی بڕیار لەسەر هاوکێشەکانی داهاتووی شەڕەکە دەدەن.

دۆناڵد ترامپ سەرۆکی ئەمریکا لە کۆتایدا بڕیارە قورسەکەیدا و واشنتن بەشداری شەڕی ئێران و ئیسرائیلی کرد و فڕۆکەی B-2ـی ئەمریکی بنکە ئەتۆمییەکانی ئێرانی بۆردومان کرد.

ئەمریکا هێرشەکەی بە فڕۆکەی جەنگی و موشەکە بەهێزەکانی ئەنجامدا، هەریەک لە بنکە ئەتۆمییەکانی فۆردۆ، نەتەنز و ئیسفەهانی بە ئامانج گرت.

هێرشەکە کاردانەوەی توندی ئێرانی لێکەوتەوە، تاران هەڕەشەی وەڵامدانەوەی توندی هێرشەکان دەکات، ئەوەیش لە رێگەی بە ئامانجگرتنی بەرژوەندییەکانی ئەمریکا لە رۆژهەڵاتی ناوەڕاستدا.

هێرشی ئەمریکا بۆ سەر بنکە ئەتۆمییەکانی ئێران، مەترسی تیشکدانەوەی ئەتۆمی دروستکردووە، بەڵام دەزگای سەلامەتی ئەتۆمیی ئێران رایگەیاندووە، نیگەران مەبن و لە دەوروبەری بنکەکان ئاسایی بژین.

ئاژانسی نێودەوڵەتیی وزەی ئەتۆمیش رایگەیاندووە، هیچ ئاماژەیەک نییە لە دوای هێرشە ئاسمانییەکانی ئەمڕۆی ئەمریکا بۆ سەر بنکە ئەتۆمییەکانی ئێران، ئاستی تیشکدانەوەی ئەتۆمی زیادبووبێت.

بەپێی پێگەی ئەمواجی بەریتانی، واشنتن پێشوەختە ئێرانی لە هێرشکردنە سەر بنکە ئەتۆمییەکان ئاگادارکردووەتەوە، وەک بەرپرسێکی ئێرانیش بە ئاژانسی رۆیتەرزی بەریتانی راگەیاندووە، پێش هێرشەکە یۆرانیۆمی پیتێنراومان لە فۆردۆ گواستووەتەوە.

هێرشەکانی ئەمریکا زوو کاردانەوەیان بە دوای خۆیاندا هێنا، حکومەتی عێراق سەرکۆنەی کرد و رایگەیاند، ئەو پەرەسەندنە سەربازییە "هەڕەشەیەکی مەترسیدارە بۆ سەر ئاسایش و ئاشتی لە رۆژهەڵاتی ناوەڕاست".

ئەمریکا ترسی هەیە
ئەمریکا لە دوای هێرشەکانی بۆ سەر ئێران، ترسی وەڵامدانەوەی هێرشەکانی لەلایەن تارانەوە هەیە، چونکە ئەو وڵاتە هەڕەشەی توندترین وەڵام دەکات.

ئەمریکا وەک بەشێک لە ئامادەکارییەکان بۆ وەڵامدانەوەی هێرشەکانی، لە یەکەم کاردانەوەدا ژمارەی کارمەندانی باڵیۆزخانەکەی لە بەغدا کەمتر کردەوە.

ئێستا ئێران لە دووڕیانێکدایە و دەتوانێت جەنگەکە گەورەتر بکات یان بە شێوەیەکی تەواوەتی کۆتایی پێبهێنێت، وەڵامدانەوەی هێرشەکان جەنگەکە گەورەتر دەکەن، یان بێدەنگ دەبن و کۆتایی پێدەهێنن.

چەند کاتژمێری داهاتوو بۆ جەنگی ئێران لەگەڵ ئیسرائیل و ئەمریکا یەکلایی کرەوە دەبێت، هەڵوێستی تاران بڕیار لەسەر هاوکێشەکانی داهاتووی شەڕەکە دەدات.

رۆژی 13ـی حوزەیران، ئیسرائیل لەناکاودا هێرشی ئاسمانی بۆ سەر ئێران دەستپێکرد، ئێرانیش وەڵامی هێرشەکانی دایەوە و 10 رۆژە شەڕی راستەوخۆی دوو وڵاتەکە دژ بە یەکتر بەردەوامە، بەڵام ئەمریکا هاوکار و پشتیوانێکی راستەوخۆی ئیسرائیل بووە و ئەمڕۆ بووە بەشێک لە جەنگەکە.

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved