هەواڵ

تەیف سامی: بەمشێوەیە پارەی مووچەی مانگی چوارم دابینکردووە

ئەمڕۆ، وەزیری دارایی عێراق لە چاوپێکەوتنێکدا ئاشکرایکرد، مانگی رابردوو ئەنجومەنی وەزیران لە کۆبوونەوەی ئاسایی خۆیدا دەسەڵاتی پێ بەخشیوە بۆئەوەی دەستکاری بڕێک پارە بکات لە بانکی مەرکەزی، بۆئەوەی پارەی مووچەی مانگەکانی نیسان و مانگەکانی دیکە دەستەبەربکات.

تەیف سامی، وەزیری دارایی عێراق، لە چاوپێکەوتنێکدا لەگەڵ ئاژانسی دەنگوباسی عێراق، دەڵێت، ئەنجوومەنی وەزیرانی عێراق لە دانیشتنی ئاسایی ژمارە 15ی خۆیدا لە 15ی نیسانی رابردوو، دەسەڵاتی پێبەخشیوە بۆ راکێشان و بەگەڕخستنەوەی ئەو بڕە پارە دانراوانەی باج کە تەمەنیان کەمترە لە پێنج ساڵ لە بانکی ناوەندی عێراق.

وەزیری دارایی عێراق وتی: توانراوە بڕی زیاتر لە 3 ترلیۆن و 45 ملیار دینار رابکێشرێت بۆ دەستەبەرکردنی مووچەی مانگی نیسان و مانگەکانی دیکە.

ئاماژە بەوەدەکات، ئەو بڕە پارەیە لە داهاتی باج بووە کە لە وەزارەتەکان کۆکراوەتەوە و هێشتا کاروباری پاکتاوەکەی تەواونەکراوە.

تەیف سامی ئەوەشی ئاشکراکرد، "زۆربەی باجدەران لە عێراق ڕاپۆرت نادەن بە بەڕێوەبەرایەتییەکانی باج بۆ تەواوکردنی رێکارەکانی باجەکانیان، بە ئامانجی خۆدزینەوە لە باجی سەپێنراو"، هەر بۆیە بەپێی یاسا لەمەودوا دەسەڵاتەکانی خۆیان کارا دەکەن بۆ سزادانی سەرپێچیکاران.

هەواڵ

پەرلەمانی کوردستان دەخرێتەوە ژێر رەحمی چەکوشی دادگای فیدراڵی عێراق

دوو سکاڵا بۆ هەڵوەشاندنەوەی ئەم خولەی پەرلەمانی کوردستان لە دادگای فیدراڵی تۆمار دەکرێت، کە ئەنجامدانی هەڵبژاردنەکەی بە بڕیاری هەمان دادگا بووە.  

 هەڵبژاردنی خولی شەشەمی  پەرلەمانی کوردستان دوای دوو ساڵ دواخستن لە وادەی خۆی، دواجار بە بڕیاری دادگای فیدراڵی کۆتایی ساڵی رابردوو ئەنجام درا.

دادگای فیدراڵی بەشێکی چیرۆکی دواخستنی هەڵبژاردنی پەرلەمانی کوردستان بوو، نزیکەی ساڵێک تاتوێی سکاڵایەکی لەبارەی هەڵبژاردنەکەوە کرد، کە دواجار بە هەڵوەشاندنەوە و دواتر کەمکردنەوەی ژمارەی کورسی کۆتایی پێکهاتەکان کۆتاییهات.

ئێستا جارێکی دیکە ئەنجامی ئەو هەڵبژاردنە خراوەتەوە بەر دەستی دادگای فیدراڵی عێراق، کۆمەڵی دادگەری کوردستان و جوڵانەوەی نەوێ نوێ رایگەیاندووە، لە دادگای فیدراڵی سکاڵایان بۆ هەڵوەشاندنەوەی خولی شەشەمی پەرلەمانی کوردستان تۆمارکردووە.
سکاڵاکەی کۆمەڵی دادگەری کە یەکەم سکاڵایە بۆ هەڵوەشاندنەوەی خولی شەشەم لەلایەن عومەر گوڵپی کاندیدی سەرکەتووی حزبەکە دژی پەرلەمانی کوردستان تۆمار کراوە.

عومەر گوڵپى سەبارەت بە تۆمارکردنی ئەو سکاڵایە رایگەیاندووە،"داوامان لە دادگاى فیدراڵی کردووە، خولەکە هەڵوەشێندرێتەوە و هەڵبژاردن دووبارە بکرێتەوە، هەروەها هەموو ئەو ئیمتیازە ماددییانەى لە پێنج مانگى ڕابردوودا پەرلەمانتاران وەریان گرتووە، لێیان وەربگیرێتەوە".

کۆمەڵى دادگەرى کە لە هەڵبژاردنى خولى شەشەمى پەرلەمانى کوردستاندا سێ کورسیى بەدەستهێنا، دواتر هەڵبژاردنەکەی بە" دیزاینکراو" وەسفکرد و بڕیاریدا بایکۆتی خولەکە بکات.

دوای چوار رۆژ لە سکاڵاکەی کۆمەڵی دادگەری، جوڵانەوەی نەوەی نوێش رایگەیاند، سکاڵایان بۆ هەڵوەشاندنەوەی پەرلەمانی کوردستان تۆمار کردووە. 

نەوەی نوێ رایگەیاندووە، سکاڵاکەی ئەوان دژی سەرۆکی هەرێمی کوردستان، ئەوەیش بەهۆی ئەوەی تا ئێستا بڕیاری هەڵوەشاندنەوەی پەرلەمانی کوردستانی دەرنەکردووە.

ڕۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجام درا، بەپێی ئەنجامی کۆتایی هەڵبژاردن کە لەلایەن کۆمسیۆنەوە بڵاوکراوەتەوە، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، هەڵوێست 4 کورسی، کۆمەڵ 3 کورسی، بەرەی گەل 2 کورسی و هەریەک لە گۆڕان و هاوپەیمانی کوردستانیش یەکی کورسییەکیان بەدەستهێناوە.

دوای نزیکەی حەوت مانگ لە ئەنجامدانی هەڵبژاردن، تا ئێستا پەرلەمانی کوردستان کارا نەبووە و تەنها پەرلەمانتاران سوێندی یاسایان خواردووە، بەڵام هەموو مانگێک مووچە وەردەرگن.