هەواڵ

دابەشکردنی مووچە دواکەوت.. بەغدا بۆ مووچەی هەرێم نانێرێت؟

40رۆژ بەسەر دابەشکردنی مووچەی مانگی ئاداردا تێپەڕدەبێت، دابەشکردنی مووچەی مانگی نیسان دواکەوتووە، هەرچەندە بەرپرسانی هەرێم پێشتر رایانگەیاندبوو مووچەی مانگی چوار زوو دەنێردرێت، بەڵام تائێستا نازانرێت بەغدا کەی مووچە دەنێرێت.

رۆژی 22ـى نیسان، وەزارەتی دارایی و ئابوری هەرێم لیستی مووچەی مانگی نیسانی فەرمانبەران و مووچەخۆرانی هەرێمی کوردستانی رادەستی فەرمانگەی ژمێریاری وەزارەتی دارایی حکومەتی فیدراڵ کرد.

لەگەڵ ناردنی لیستی مووچەدا، وەزارەتی دارایی تیمێکی تەکنیکی رەوانەی بەغداکرد، بۆئەوەی هەر تێبینییەک لەسەر لیستەکە هەبێت بە زووی وەڵامبدرێتەوە.

لە کۆتایی مانگی رابردووەوە، وەزارەتی دارایی عێراق پێداچونەوەی بە لیستی مووچەی هەرێمدا تەواو کردووە و هیچ تێبینییەکی نەبووە، بەڵام بەبێ ئەوەی هیچ بیانویەک بخەنەڕوو، ناردنی مووچەی مانگی پێنجی هەرێم نەناردووە.

بەرپرسانی حکومەتی هەرێم جەختدەکەنەوە،  کە هەموو داواکارییەکانی عێراقیان وەک خۆی جێبەجێکردووە و بەتایبەت لە پرسی مووچەدا هیچ کێشە و گرفتێک نییە.

لەگەڵ ئەوەی بەرپرسانی عێراق باس لە کێشەی نەبونی نەختینەیی دەکەن، بەڵام لقی هەولێری بانکی ناوەندیی عێراق بەشی دوو مانگ موچەی هەرێمی کوردستانی پارەی کاشی تێدایەو ناردنی موچە تەنها فەرمانێکی دەوێت، نەوەکو ناردنی پارەی نەختینە لەبەغداوە بۆ هەولێر.

نوسراوی کۆتایی پێویستی بەواژۆی وەزیری دارایی عێراق نییە، بەڵکو تەنها فەرمانێکی ئەو بەسە بۆ ئەوەی بەڕێوەبەری گشتیی فەرمانگەی ژمێرکاری نوسراوی فەرمی ئاراستەی لقی هەولێری بانکی ناوەندی بکات بۆ خستنەسەر هەژماری هەرێمی کوردستان.

بەپێی بەدواداچوونەکان، تائێستا هیچ بیانویەک بۆ نەناردنی مووچەی مووچەخۆانی هەرێم لەلایەن بەغداوە نییە و بەرپرسانی هەرێمیش چاوەڕێ ناردنی مووچەن لەلایەن بەغداوە.

هەواڵ

پەرلەمانی کوردستان دەخرێتەوە ژێر رەحمی چەکوشی دادگای فیدراڵی عێراق

دوو سکاڵا بۆ هەڵوەشاندنەوەی ئەم خولەی پەرلەمانی کوردستان لە دادگای فیدراڵی تۆمار دەکرێت، کە ئەنجامدانی هەڵبژاردنەکەی بە بڕیاری هەمان دادگا بووە.  

 هەڵبژاردنی خولی شەشەمی  پەرلەمانی کوردستان دوای دوو ساڵ دواخستن لە وادەی خۆی، دواجار بە بڕیاری دادگای فیدراڵی کۆتایی ساڵی رابردوو ئەنجام درا.

دادگای فیدراڵی بەشێکی چیرۆکی دواخستنی هەڵبژاردنی پەرلەمانی کوردستان بوو، نزیکەی ساڵێک تاتوێی سکاڵایەکی لەبارەی هەڵبژاردنەکەوە کرد، کە دواجار بە هەڵوەشاندنەوە و دواتر کەمکردنەوەی ژمارەی کورسی کۆتایی پێکهاتەکان کۆتاییهات.

ئێستا جارێکی دیکە ئەنجامی ئەو هەڵبژاردنە خراوەتەوە بەر دەستی دادگای فیدراڵی عێراق، کۆمەڵی دادگەری کوردستان و جوڵانەوەی نەوێ نوێ رایگەیاندووە، لە دادگای فیدراڵی سکاڵایان بۆ هەڵوەشاندنەوەی خولی شەشەمی پەرلەمانی کوردستان تۆمارکردووە.
سکاڵاکەی کۆمەڵی دادگەری کە یەکەم سکاڵایە بۆ هەڵوەشاندنەوەی خولی شەشەم لەلایەن عومەر گوڵپی کاندیدی سەرکەتووی حزبەکە دژی پەرلەمانی کوردستان تۆمار کراوە.

عومەر گوڵپى سەبارەت بە تۆمارکردنی ئەو سکاڵایە رایگەیاندووە،"داوامان لە دادگاى فیدراڵی کردووە، خولەکە هەڵوەشێندرێتەوە و هەڵبژاردن دووبارە بکرێتەوە، هەروەها هەموو ئەو ئیمتیازە ماددییانەى لە پێنج مانگى ڕابردوودا پەرلەمانتاران وەریان گرتووە، لێیان وەربگیرێتەوە".

کۆمەڵى دادگەرى کە لە هەڵبژاردنى خولى شەشەمى پەرلەمانى کوردستاندا سێ کورسیى بەدەستهێنا، دواتر هەڵبژاردنەکەی بە" دیزاینکراو" وەسفکرد و بڕیاریدا بایکۆتی خولەکە بکات.

دوای چوار رۆژ لە سکاڵاکەی کۆمەڵی دادگەری، جوڵانەوەی نەوەی نوێش رایگەیاند، سکاڵایان بۆ هەڵوەشاندنەوەی پەرلەمانی کوردستان تۆمار کردووە. 

نەوەی نوێ رایگەیاندووە، سکاڵاکەی ئەوان دژی سەرۆکی هەرێمی کوردستان، ئەوەیش بەهۆی ئەوەی تا ئێستا بڕیاری هەڵوەشاندنەوەی پەرلەمانی کوردستانی دەرنەکردووە.

ڕۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجام درا، بەپێی ئەنجامی کۆتایی هەڵبژاردن کە لەلایەن کۆمسیۆنەوە بڵاوکراوەتەوە، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، هەڵوێست 4 کورسی، کۆمەڵ 3 کورسی، بەرەی گەل 2 کورسی و هەریەک لە گۆڕان و هاوپەیمانی کوردستانیش یەکی کورسییەکیان بەدەستهێناوە.

دوای نزیکەی حەوت مانگ لە ئەنجامدانی هەڵبژاردن، تا ئێستا پەرلەمانی کوردستان کارا نەبووە و تەنها پەرلەمانتاران سوێندی یاسایان خواردووە، بەڵام هەموو مانگێک مووچە وەردەرگن.