هەواڵ

هەولێر و بەغداد دەستدەکەنەوە بە کۆبوونەوە

Mic
2025-06-28

موچەخۆرانی هەرێمی کوردستان بە هەستیارییەوە چاودێریی ئەنجامەکانی کۆبوونەوەی شاندی دانوستاندنی بەغداد لە هەولێر دەکەن کە بۆ چارەسەرکردنی پرسە هەڵپەسێردراوەکان لەنێوان هەردولا سەردانی هەرێمی کوردستانیان کردووە و باسی ئەوە دەکرێت رێککەوتن و لێکتێگەیشتن لەنێوانیاندا هەبێت.

شاندێکی باڵای حکومەتی عێراق لە هەولێرن و دەسەڵاتی تەواویان پێدراوە بۆ بەلاداخستنی ناکۆکییەکانی نێوان هەولێر و بەغداد لە پرسەکانی داهاتی ناوخۆ، هەناردەی نەوت و شایستەداراییەکانی موچەخۆران، کۆبوونەوەکانیان دەستپێکردووەتەوە و باس لەوە دەکرێت لەسەر هەندێک پرس رێکەوتن کراوە.

مایک نیوز، زانیویەتی، لیژنە باڵاکەی عێراق پێکهاتوون لە د.فوئاد حسێن، جێگری سەرۆک وەزیرانی عێراق بۆ کاروباری دارایی، وەزارەتی نەوت، دیوانی چاودێری دارایی عێراق، نوێنەری کۆمپانیای سۆمۆ و کۆمپانیای نەوتی باکور.

شاندەکەی بەغداد گفتوگۆ لەسەر ئەو رێككەوتنە هاوبەشە دەکەن کە لە مانگی شوباتی 2025، لە نێوان هەولێر و بەغداد واژۆکراوە.

دۆسییەی داهاتی ناوخۆ و خەرجییەكانی هەرێم و هەناردەكردنەوەی نەوت، لەلایەن شاندەکەی بەغدادەوە دانوستانی لەسەر دەکرێت.

بڕیارە سبەی لەگەڵ دەستپێکردنەوەی دەوامی فەرمانگە حکومییەکان، شاندەكەی عێراق بەوردی باس لە دۆسیەی داهاتی ناوخۆ لەگەڵ هەرێم بکەن.

سەبارەت بە ناکۆکییەکان لەپرسی نەوتداا، شێروان دووبەردانی، پەرلەمانتاری کورد لە ئەنجومەنی نوێنەرانی عێراق، ئاشکرایکردووە، هەردوولا گەیشتوونەتە ئەنجامێکی زۆر باش و رێککەوتنێکی باشییانکردووە لەسەر بابەتی هەناردەکردنەوەی نەوتی هەرێم.

 ئەم هەفتەیە کۆبوونەوە لەگەڵ کۆمپانیاکانی نەوت لە هەرێمی کوردستان دەستپێدەکەن بۆئەوەی ناوەڕۆکی یاسای بودجەی عێراقیان لەگەڵ جێبەجێبکرێت بە کرێی دەرهێنانی یەک بەرمیل نەوت بە 16 دۆلار خەمڵێنراوە.

ئەوەی جێگەی نیگەرانییە چارەسەرکردنی ئەم بابەتە خراوەتە پاش پێنەدانی 2 مانگ موچەی فەرمانبەرانەوە، لەکاتێکدا چەندین مانگە ئەم یاسایە دەرکراوە و هەرێم و بەغداد مکوڕنەبوون بۆ جێبەجێکردنی ناوەڕۆکی یاسای بودجە و دروستنەکردنی گرفت لەبەردەم شایستە داراییەکانی موچەخۆرانی هەرێمی کوردستان.

کۆمپانیاکانی نەوت لەماوەی ساڵی رابردوودا کاتێک لەگەڵ لایەنی عێراقی کۆبوونەتەوە رەزامەند بوون بە 16 دۆلارەکە بۆ هەر بەرمیلێک نەوت، بەڵام لەسەر ئەوە رێکنەکەوتوون ئەگەر لە 500 هەزار بەرمیل نەوت زیاتر بەرهەمهێنرا ئایا ئەو بڕە پارەیە دەدرێت لە بەغدادەوە، بەڵام وەزارەتی نەوت و وەزارەتی دارایی بەوە قایل نەبوون.

واتە ئەگەر کۆمپانیاکان توانییان لەو بڕە زیاتر بەرهەمبهێنن و رۆژانە 700 هەزار بەرمیلیان بەرهەمهێنا، بەغداد چۆن پارەی ئەو 200 هەزار بەرمیلە زیادەیە دەدات، ئەوەش خاڵی ناکۆکبووە لە نێوان بەغداد و هەرێم.

هێشتا نەزانراوە ئەمڕۆ شەممە هەردوو شاندنی بەغداد و هەرێم چۆن رێککەوتون لەوبارەیەوە، بەڵام ئەم بابەتە و ئاستەنگەکانی دیکە کۆنن و هەردولا دەیانتوانی پێشتر چارەسەری بکەن و نەگاتە ئاستێک دۆخی گوزەرانی فەرمانبەران بە بارمتە بگیرێت و موچەکانیان گل بدرێتەوە.

شێروان دووبەردانی، ئاماژەی بەوەکردووە لە ماوەکانی داهاتوودا هاتنی شاندی دیکە لە بەغدادەوە بۆ هەرێم بەردەوام دەبێت، بەتایبەتی بڕیارە شاندی وەزارەتی دارایی بێن و لەسەر بەرکەوتەی 50٪ی داهاتی ناوخۆ لەگەڵ هەرێم رێکبکەون، چونکە هەرێم پابەندییەکانی خۆی خستووەتەڕوو.

شوان محەمەد، ئەندامی ئەنجوومەنی نوێنەرانی عێراق، پێشبینی کردووە بەم نزیکانە رێککەوتنێکی هەمەلایەنە لەنێوان بەغدا و هەولێر بکرێت، بۆ دووبارە هەناردەکردنەوەی نەوتی کوردستان لە رێگەی رێکخراوی نێودەوڵەتی بۆ بەبازاڕکردنی نەوت (سۆمۆ) و چارەسەرکردنی قەیرانی مووچەی فەرمانبەران کە چەند مانگێکە بەردەوامە.

شوان محەمەد، لە بەیاننامەیەکدا ئاماژەی بەوەکردووە، "وەزارەتی دارایی فیدراڵی بەرپرسیارە لە پێدانی باجی کۆمپانیا نەوتییە کارپێکەرەکان، هاوکات گەرەنتی دەدات کە هیچ ئاستەنگێک لە رێگەی پرۆسەکە دانەنرێت".

ئەو پەرلەمانتارە کوردە روونیشیکردەوە، "سەرکەوتنی ئەم رێککەوتنە کاریگەری راستەوخۆی دەبێت لەسەر پرسی مووچە و رێگە خۆشدەکات بۆ چارەسەرکردنی کێشە داراییە هەڵپەسێردراوەکانی نێوان هەردوولا".

لەگەڵ نزیکبوونەوەی هەڵبژاردنەکان، لایەنە عێراقییەکان خۆیان بۆ ئاستەنگە ناوخۆیی و دەرەکییەکان ئامادە دەکەن کە پێویستی بەچارەسەرکردنی ناکۆکییەکان و بەهێزکردنی بەرەی ئابووری هەیە.

فشاری زۆر لەسەر عێراق هەیە وەکو دابەزینی هەناردەی نەوت و زیادبوونی فشارە نێودەوڵەتییەکان بۆ سەر حکومەتی فیدراڵی بۆ دەستەبەرکردنی شەفافیەت لە بەڕێوەبردنی سەرچاوەکانیدا، هەروەها داواکارییەکانی کورد بەرەو هەڵکشان دەچن بۆ کۆتاییهێنان بەو سیاسەتەی بەغداد کە بە "سزادانی بەکۆمەڵ"ی فەرمانبەرانی هەرێم لە رێگەی دواکەوتنی مووچەوە وەسفدەکریت

بابەتی لێکچو

More News

Most Popular

هەواڵ

سەرۆکی دادگای باڵای فیدراڵی خانەنشینکرا

Mic
2025-06-29

ئەنجوومەنی باڵای دادوەری ئەمڕۆ یەکشەممە 29ی حوزەیرانی 2025، خانەنشین بوونی دادوەر جاسم محەمەد عەبود، سەرۆکی ئێستای دادگای باڵای فیدراڵی عێراقی پشتڕاستکردەوە، بە هۆکاری تەندروستی و راگەیاند. ئەنجومەنەکە جێگری سەرۆکی دادگای فیدراڵی دادوەر مونزیر ئیبراهیم حوسێنی وەک جێگرەوەی خۆی کاندیدکردووە.

بەشی راگەیاندنی ئەنجوومەنی باڵای دادوەری عێراق، لە بەیاننامەیەکدا، رایگەیاندووە، رۆژی یەکشەممە 19ی حوزەیرانی 2025، ئەو لیژنەیەی لە مادەی 3 بڕگەی (یەکەم و دووەم)ی یاسای دادگای باڵای فیدراڵی ژمارە 30ی ساڵی 2005، وەک هەموارکراوە، دیاریکراوە، کۆبوونەوە و رەزامەندی لەسەر خانەنشینکردنی دادوەر جاسم محەمەد عەبود، سەرۆکی ئێستای دادگای باڵای فیدراڵی عێراقی، بە هۆکاری تەندروستی، و… کاندیدکردنی جێگری سەرۆکی دادگای فیدراڵی دادوەر مونزیر ئیبراهیم حسێن وەک جێگرەوەی دەستنیشانکراوە و ناوەکەی نێردراوە بۆ سەرۆککۆماری عێراق بەمەبەستی پەسەندکردنی.

دادوەر مونزیر ئیبراهیم حسێن لە ساڵی 1963 لە بەغداد لەدایکبووە، بڕوانامەی یاسایی لە کۆلێژی یاسا لە زانکۆی بەغداد لە ساڵی 1989 بەدەستهێناوە و لە ساڵی 1998 پەیمانگای دادوەری تەواوکردووە، خولی (21). لە ساڵی 2018ەوە لە دادگای فیدراڵی کاردەکات.

لە ئێستادا وەک جێگری سەرۆکی دادگای فیدراڵی و سەرۆکی دەستەی تاوانەکانی و ئەندامی یەدەگی دادگای باڵای فیدراڵی کاردەکات.

 

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved