هەواڵ

درۆنێکی بۆمبڕێژکراو لە گەرمیان کەوتەخوارەوە

بەپێی زانیارییەکانی مایک نیوز، پاشنیوەڕۆی ئەمرۆ، درۆنێکی بۆمبڕێژکراو کە دوو بۆمبی لەگەڵ خۆی هەڵگرتبوو لە نزیک گوندی گەرمک و سەیدە سەر بە ناحیەی کۆکس لە ئیدارەی گەرمیان کوتووەتە خوارەوە و هێشتا نەزنراوە درۆنەکە بەرەوکوێ ئاڕاستەکراوە پێشتر.

عەقید سەلام عبدالخالق، وتەبێژی دەزگای ئاسایشی هەرێم زانیارییەکانی بۆ مایک نیوز پشتڕاستکردەوە و وتی: کاتژمێر 1:20 خولەکی پاشنیوەڕۆی ئەمڕۆ 3/7/2025 لە نزیک ناحیەی کۆکس لە سنووری گەرمیان درۆنێکی بۆمبڕێژکراو کەوتەخوارەوە و دەستبەجێ تیمەکانی ئاسایش گەیشتنە شوێنی ڕووداوەکە و لێکۆڵینەوەیان دەستپێکردووە و کەوتنەخوارەوەی درۆنەکە هیچ زیانێکی گیانی نەبووە.

سەرچاوەیەک لە شوێنی رووداوەکە بە مایک نیوزی راگەیاند، رەنگە بەهۆی بەرزیی پلەی گەرمیی ناوچەکەوە فڕۆکەکە توشی کێشەی تەکنیکی بوبێت، یان وزەی کارپێکردنی لەدەستدابێت، هەر بۆیە نەیتوانیوە بگاتە ئامانجەکەی خۆی و لەو ناوچەیە کەوتووەتە خوارەوە.

رۆژی 1ی تەموز، بە موشەک و درۆن هێرشکرایە سەر فڕۆکەخانەی کەرکوک و پاڵاوگەی بێجی، لە ئەنجامدا کەسێک برینداربوو، بەبێ ئەوەی هیچ زیانێکی دیکەی هەبێت.

پاشان لە شەوی 2ی تەموز بە درۆنی بۆمبڕێژکراو هێرشکرایە سەر هێزەکانی 70 لە شاری سلێمانی و ناوچەی تاسڵوجە، پاشان بە درۆن کەمپی ئاوارەکان لە دهۆک کرایە ئامانج.

هێشتا ئەنجامدەری هێرشەکان ئاشکرانەبووە و هێزە ئەمنییەکان هیچ ئەنجامێکی لێکۆڵینەوەکانی خۆیان ئاشکرا نەکردووە.

هەواڵ

درۆنەکانی ئیسرائیل ئەحمەد حاجی رەشید راپێچی بەردەم دادگای هەولێر دەکەن

دادگای لێکۆڵینەوەی هەولێر بە تۆمەتی هەڵبەستن و مامەڵەکردن دژی ئاسایشی نیشتمانی فەرمانی دەستگیرکردنی بۆ ئەحمەدی حاجی ڕەشید، ئەندامی پێشووی فراکسیۆنی کۆمەڵی دادگەریی کوردستان لە پەرمانی عێراق دەرکرد.

 دادگای لێكۆڵینه‌وه‌ی هه‌ولێر لە نوسراوێکدا سه‌رجه‌م هێزه‌ ئه‌منییه‌كان و لایه‌نی په‌یوه‌ندیدار ئاگادار کردوەتەوە، "له‌هه‌ر شوێنێك ئه‌حمه‌د حاجی ڕه‌شید، ئه‌ندامی مه‌كته‌بی سیاسی كۆمه‌ڵی دادگه‌ریتان بینی ده‌ستگیری بكه‌ن، چونكه‌ له‌ دادگا سكاڵای له‌سه‌ر تۆمار كراوه‌ و فه‌رمانی ده‌ستگیركردنی بۆ ده‌رچووه‌".

فەرمانگەی لێکۆڵەرەوەی دادوەری لە دادگای لێکۆڵینەوەی هەولێر، بە نووسراوی 1980، داوای لە دادگای لێکۆڵینەوەی سلێمانی کردووە تۆمەتبارەکەیان بە دەستگیرکراوی ڕادەست بکات.

فەرمانی دەستگیرکردنەکە بە پێی ماددەی 226ـی یاسای سزادانی عێراقی دەرچووە، ئەوەیش دوای ئەوەی کەناڵی "عەهد " لە زاری ئەحمەد حاجی رەشیدەوە بڵایکردەوە،" هەندێک لایەنی کوردی خزمەتێکی گەورەیان پێشکەشی ئیسرایل کردووە و ئاسانکارییان بۆ ناردنی 10 هەزار درۆن بۆ خاکی ئێران کردووە". 

لە ماددەی 226 لەیاسای سزادانی عێراقیدا هاتوە"هەر كەسێك بەشێوەیەكی ئاشكرا سوكایەتی بە ئەنجومەنی گەل، حكومەت، دادگاكان، هێزە چەكدارەكان یان هەر دەستەیەكی نیزامی‌و دەسەڵاتێكی گشتی، بەرژەوەندی یان فەرمانگەیەكی فەرمی‌ و نیمچە فەرمی بكات، سزا دەدرێت بە زیندانیكردن بۆ ماوەیەك كە لە حەوت ساڵ زیاتر نەبێت یان حەبسكردنی یاخود غەرامەكردنی". 

دوای ده‌رچوونی فەرمانی دەستگیرکردنەکە، ئه‌حمه‌دی حاجی ره‌شید لە رونکردنەوەیەکدا بڵاویکردەوە"کەناڵی عەهد لێدوانیکی منیان بەشێواوی بڵاوکردووەتەوە، دوای قسەکردن لەگەڵ کەناڵی ناوبراو و ئاگادارکردنەوەیان، سکاڵای یاساییان لەسەر تۆمار دەکەم"، هەر بۆیە داوای لێبووردنیان کردووه‌، دوو سەرنووسەری کەناڵەکەیان لەکار دورخستووەتەوە و سەرجەم هەواڵەکەشیان لەته‌واوی گرووپی تیلیگرام و سۆشیال میدیاكانیان سڕییەوە.