هەواڵ

رۆژی ئازادی کاری رۆژنامەوانیی

ئەمڕۆ، 3ی ئایار، وەکو "رۆژی جیهانیی ئازادی رۆژنامەگەریی" دەناسرێت لەلایەن رێکخراوی نەتەوە یەکگرتووەکانەوە و رێکخراوی یونیسکۆ، رایدەگەیەنێت، ئەم رۆژە بۆ بیرهێنانەوەی حكومەت و دەسەڵاتەکانە کە وابەستەبن بە بەرپرسیارێتییەکانیان بۆ پاراستنی ئازادی رادەربڕین و کاری رۆژنامەوانی.

رێکخراوی یونیسکۆ، لەسەر ماڵپەڕی فەرمی خۆی، هەروەها ئاماژە بەوەدەدات، رۆژی جیهانی ئازادی کاری رۆژنامەوانیی دەرفەتێکە بۆ کۆکرنەوەی پشتیوانی بۆ ناوەندەکانی راگەیاندن کە لەبەردەمی هەڕەشە و مافخواردندان و مافی خۆیانە دەستەبەری ئازادی کاری رۆژنامەوانییان بۆ بکرێت.

رێكخراوی پەیامنێرانی بێسنور، ئاشکرایدەکات، لە عێراق رۆژنامەوانان لە هەموو لایەكەوە رووبەڕووی هەڕەشە دەبنەوە، بەڵام لەگەڵ ئەوەشدا ئازادیی رۆژنامەوانی لە عێراق بۆ ئەمساڵ هەنگاوێكی گەورەی ناوە و 14 پلە هاتووەتە پێشەوە و لەسەر ئاستی جیهانیش وڵاتی نەرویج بۆ نۆیەمین ساڵ، پلەی یەکەمی هەیە لەریزبەندی وڵاتانی جیهاندا بۆ پاراستنی ئازادی رۆژنامەوانیی.

کاریگەرییەکانی سۆشیاڵ میدیا و ئەو گۆڕانکارییانەی کە زیرەکی دەستکرد و هەواڵی ساختە لەبواری کاری رۆژنامەوانیدا دروستی کردووە، هۆکارێکە بۆئەوەی گرنگی زیاتر بدرێت بە کاری رۆژنامەوانیی پیشەیی، دەستەبەرکردنی زانیاریی پشتڕاستکراوە و دروست بۆ خەڵک.

ساڵانە لەم رۆژەدا رێکخراوی پەیامنێرانی بێسنور، راپۆرتێک بڵاودەکاتەوە و سەرجەم زانیارییەکان لەبارەی ئازادی رۆژنامەوانی لە جیهاندا دەخاتەڕوو، لەبارەی عێراقەوە دەنوسێت: "عێراق لە پاراستنی رۆژنامەوانان شكستی هێناوە"، بەهۆی ناسەقامگیریی سیاسی و فشارە داراییەکان لەسەر رۆژنامەوان و دەزگا میدیاییەکان.

عێراق بۆ ئەمساڵ لە پلەی 155ـی وڵاتان دەبینرێت لەکۆی 180 وڵات، لەبارەی ئازادیی رۆژنامەگەرییەوە، لەکاتێکدا ساڵی رابردوو عێراق لە ریزبەندی 169دا بووە، بەڵام ئەمساڵ 14 پلە هاتووەتە پێشەوە، لەگەڵ ئەوەشدا لە پاڵ دەیان وڵاتی تر هەر لە هێڵی سووردایە.

نۆ ساڵە وڵاتی نەرویج سەلامەترین وڵاتە بۆ رۆژنامەوانان و پلەی یەكەمی گرتووە، لە دوای ئەویش ئیستۆنیا و هۆڵەندا پلەكانی دووەم و سێیەمیان گرتووە، سوید و دانیمارك و فینلەندا و ئێرلەندا و پرتوگال و سویسرا و چیك، پلەكانی دواتریان گرتووە.

رێكخراوی پەیامنێرانی بێسنور، ئاماژە بەوەدەکات، ئەریتریا خراپترین وڵاتە بۆ رۆژنامەنووسان و پلەی كۆتایی و 180 گرتووە، دوای ئەویش كۆریای باكور و چین و سووریا و ئێران و ئەفغانستان دێن.

هەواڵ

پەرلەمانی کوردستان دەخرێتەوە ژێر رەحمی چەکوشی دادگای فیدراڵی عێراق

دوو سکاڵا بۆ هەڵوەشاندنەوەی ئەم خولەی پەرلەمانی کوردستان لە دادگای فیدراڵی تۆمار دەکرێت، کە ئەنجامدانی هەڵبژاردنەکەی بە بڕیاری هەمان دادگا بووە.  

 هەڵبژاردنی خولی شەشەمی  پەرلەمانی کوردستان دوای دوو ساڵ دواخستن لە وادەی خۆی، دواجار بە بڕیاری دادگای فیدراڵی کۆتایی ساڵی رابردوو ئەنجام درا.

دادگای فیدراڵی بەشێکی چیرۆکی دواخستنی هەڵبژاردنی پەرلەمانی کوردستان بوو، نزیکەی ساڵێک تاتوێی سکاڵایەکی لەبارەی هەڵبژاردنەکەوە کرد، کە دواجار بە هەڵوەشاندنەوە و دواتر کەمکردنەوەی ژمارەی کورسی کۆتایی پێکهاتەکان کۆتاییهات.

ئێستا جارێکی دیکە ئەنجامی ئەو هەڵبژاردنە خراوەتەوە بەر دەستی دادگای فیدراڵی عێراق، کۆمەڵی دادگەری کوردستان و جوڵانەوەی نەوێ نوێ رایگەیاندووە، لە دادگای فیدراڵی سکاڵایان بۆ هەڵوەشاندنەوەی خولی شەشەمی پەرلەمانی کوردستان تۆمارکردووە.
سکاڵاکەی کۆمەڵی دادگەری کە یەکەم سکاڵایە بۆ هەڵوەشاندنەوەی خولی شەشەم لەلایەن عومەر گوڵپی کاندیدی سەرکەتووی حزبەکە دژی پەرلەمانی کوردستان تۆمار کراوە.

عومەر گوڵپى سەبارەت بە تۆمارکردنی ئەو سکاڵایە رایگەیاندووە،"داوامان لە دادگاى فیدراڵی کردووە، خولەکە هەڵوەشێندرێتەوە و هەڵبژاردن دووبارە بکرێتەوە، هەروەها هەموو ئەو ئیمتیازە ماددییانەى لە پێنج مانگى ڕابردوودا پەرلەمانتاران وەریان گرتووە، لێیان وەربگیرێتەوە".

کۆمەڵى دادگەرى کە لە هەڵبژاردنى خولى شەشەمى پەرلەمانى کوردستاندا سێ کورسیى بەدەستهێنا، دواتر هەڵبژاردنەکەی بە" دیزاینکراو" وەسفکرد و بڕیاریدا بایکۆتی خولەکە بکات.

دوای چوار رۆژ لە سکاڵاکەی کۆمەڵی دادگەری، جوڵانەوەی نەوەی نوێش رایگەیاند، سکاڵایان بۆ هەڵوەشاندنەوەی پەرلەمانی کوردستان تۆمار کردووە. 

نەوەی نوێ رایگەیاندووە، سکاڵاکەی ئەوان دژی سەرۆکی هەرێمی کوردستان، ئەوەیش بەهۆی ئەوەی تا ئێستا بڕیاری هەڵوەشاندنەوەی پەرلەمانی کوردستانی دەرنەکردووە.

ڕۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجام درا، بەپێی ئەنجامی کۆتایی هەڵبژاردن کە لەلایەن کۆمسیۆنەوە بڵاوکراوەتەوە، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، هەڵوێست 4 کورسی، کۆمەڵ 3 کورسی، بەرەی گەل 2 کورسی و هەریەک لە گۆڕان و هاوپەیمانی کوردستانیش یەکی کورسییەکیان بەدەستهێناوە.

دوای نزیکەی حەوت مانگ لە ئەنجامدانی هەڵبژاردن، تا ئێستا پەرلەمانی کوردستان کارا نەبووە و تەنها پەرلەمانتاران سوێندی یاسایان خواردووە، بەڵام هەموو مانگێک مووچە وەردەرگن.