هەواڵ

ئەردۆغان خواستی رۆژئاوای کوردستان بۆ خۆبەڕێوەبەریی رەتدەکاتەوە

ئەمڕۆ، چوارشەممە، سەرۆک کۆماری تورکیا رایگەیاند، داخوازیی کوردەکان لە سوریا بۆ بونیادنانی خۆبەڕێوەبەریی لە رۆژهەڵاتی سوریا، "جگە لە خەونێک"، هیچ جێگەیەکی دیدکەی نییە لە واقعدا.

رەجەب تەیب ئەردۆغان، سەرۆکی تورکیا، لەناو فڕۆکەدا و لەکاتی گەڕانەوەی لە ئیتاڵیا، وەڵامی پرسیارەکانی رۆژنامەنوسانی دایەوە و وتی: ئەنقەرە رێگە بەوەنادات لەهیچ ناوچەیەکی سوریا سیاسەتی سەپاندنی ئەمری واقیع جێبەجێ بکرێت و مەترسیی لەسەر ئاسایش و یەکپارچەیی خاکی سوریا دروست ببێت.

رۆژی شەممەی رابردوو، لەشاری قامیشلۆی رۆژئاوای کوردستان، کۆنگرەیەک رێکخرا بۆ یەکخستنی دەنگ و داخوازییەکانی پێکهاتە و هێزە جیاجیاکان لە رۆژهەڵات و باکوری سوریا، تیایدا بڕیاردرا لە دانوستانەکاندا خواستی دەسەڵاتێکی خۆبەڕێوەبەریی لە ناوچەکەدا جێگیربکرێت.

ئەردۆغان، لە وەڵامی ئەو داخوازییەدا جەختی لەوەکردەوە بابەتی جێگیرکردنی سیستمێکی فیدراڵیی لەو ناوچانەی سوریا، خەونێکی بەدینەهاتووە و هیچ پێگەیەکی لە واقیعدا نییە.

سەرۆک کۆماری تورکیا رووی لە رحژئاوای کوردستان کرد و وتی: ئامۆژگارییان دەکەم بڕیاری مەنتیقی بدەن، نەک بڕیارێک کە لەسەر خەون هەڵچنرابێت.

ئەوەشی خستەڕوو، هەموو دەستپێشخەرییەک رەتدەکاتەوە کە سەقامگیریی هەمیشەیی لە سوریا و ناوچەکە بخاتە مەترسییەوە.

ئەردۆغان جەختیکردەوە، ئەنقەرە جگە لە ‌حکومەتەکەی دیمەشق هیچ ئیدارە و ‌حکومەتێکی دیکە بە رەسمی ناناسێت، هەروەها رێگە نادات هیچ هێزێکی دیکە هەبێت لە سوریادا، جگە لە سوپای یەکگرتووی سوریا و بەرنامەیان روونە سەبارەت بە پاراستنی ئاسایشی سنورەکانی تورکیا.

هەواڵ

ناکۆکییەکان تەواو بوون… "هەژماری من" کۆتایی بە چیرۆکی "تەوتین" هێنا

یەکێتی کۆتایی بە نیگەرانییەکانی لەسەر  "هەژماری من" هێنا و پشتیوانی بۆ پرۆسەکە راگەیاند، قوباد تاڵەبانی دەڵێت، پڕۆژەکە دەستبەکار دەبێت.

"هەژماری من" یەکێک بوو لە ناونیشانی ناکۆکییەکانی بانگەشەی توندی هەڵبژاردنی پارتی دیموکراتی کوردستان و یەکێتیی نیشتمانی کوردستان، بەڵام ئێستا هەردوولا لەسەری کۆکن.

 قوباد تاڵەبانی جێگری سەرۆکی حکومەتی هەرێمی کوردستان لە پشکی یەکێتی لە دوایین لێدوانیدا پشتیوانی بۆ " هەژماری من" راگەیاند و وتی،"پڕۆژەکە دەستبەکار دەبێت". 

قوباد تاڵەبانی باسی لەوەکرد، ئەو نیگەرانییانەی ئەوان لە رابردوو لەسەر پڕۆژەکە هەیان بووە، یەکلابوونەتەوە بۆیە پڕۆژەکە دەستبەکار دەبێت. 

دوایین هەڵبژاردن "هەژماری من" تەوەری گفتوگۆکانی پارتی و یەکێتی بوو، بە بڕیاری مەسرور بارزانی پڕۆژەکە لە نوسینگەکەیەوە گوازرایەوە سەر وەزارەتی دارایی و ئابوری هەرێمی کوردستان.

هەنگاوەکە وەک بەشێک لە لێکتێگەیشتنی پارتی و یەکێتی بۆ پێکهێنانی کابینەی دەیەمی حکومەتی هەرێمی کوردستان جێبەجێ کرا، بەڵام تا ئێستا ئەو هەنگاوە هیچ کاریگەرییەکی ئەوتۆیی لەسەر خێراکردنی گفتوگۆکانی پێکهێنانی حکومەت نەبووە. 

یەکێتی لەسەرو هەموویانەوە، بافڵ تاڵەبانی سەرۆکی حزبەکە لە ماوەی هەڵمەتی بانگەشەی هەڵبژاردندا هەڵمەتێکی چڕیان دژ بە پرۆژەکە ئەنجامدا.

 تەنانەت بە بڕیاری یەکێتی، نوسینگەکانی پرۆژەکە لە ناو بانکە حکومییەکانی سلێمانی داخران و داوا لە هاوڵاتییان کرا لە بانکە فیدراڵییەکانی عێراق "تەوتین" بکەن. 

بەپێی بەدواداچوونەکانی دیجیتاڵ میدیای Mic، دوای کۆتایهاتنی ناکۆییەکانی پارتی و یەکێتی لەسەر " هەژماری من" ئێستا هەنگاوەکانی بەشداربوونی مووچەخۆران لە سنوری سلێمانی، هەڵەبجە، گەرمیان و راپەڕین خێراتر کراوە. 

رێککەوتنی پارتی و یەکێتی بە جۆرێک کۆتایی بە چیرۆکی "تەوتین" لە بانکە فیدراڵییەکانی عێراق هێناوە، ئێستا کەمن ئەو مووچەخۆرانەی باسی "تەوتین" دەکەن، لە کاتێکدا لە رابردوو جیاواز لە خۆپیشاندانەکان فەرمانبەران بە مانگرتن لە خواردن داوای جێبەجیکردنیان دەکرد.