VT

مووچەی مەرگ.. لەهەرێمێک کە 29 ساڵە کورد حوکمڕانی دەکات

.لە ئاپۆڕەیەکی هەزاران کەسیدا و لەژێر گەرمای تەمووزی تاقەتپڕوکێندا، بەساڵاچوویەك لەکاتی چاوەروانی مووچە 200 هەزارییەکەی گیانی لەدەستدا لەژێر سایەی دەسەڵاتێك کوردی کە 29 سالە حوکمرانی دەکات

بە هەزاران خانەنشین کە تەمەنی زۆربەی هەرەزۆریان لەسەر و 70 ساڵییەوەیە، دەبێت لەژێر پلەی گەرمای نزیک لە 50 و لە پاڵەپەستۆیەکی تونددا بمێننەوە، لەپێناو وەرگرتنی مووچەیەکی 200 هەزاری.

بەرپرسانی باڵای حکومەت، بانگەشەی ئەوە دەکەن، کە توانیویانە لە کابینەی نویەمدا، زۆر پرۆژەی گرنگ و زۆر هەنگاوی چاکسازی بنێن، لەکاتێکدا هێشتا لەهەرێمێکی 5 ملیۆنی کە تەمەنی حکومەتەکەی 29 ساڵی تێپەڕاندوە، هیچ سیستمێکی بانکی نییە بۆ دابەشکردنی مووچە.

10 ى ئەم مانگە، تەمەنی کابینەی نۆیەم ، دوو ساڵی پڕکردەوە، هەریەک لە مەسرور بارزانی سەرۆکی حکومەتی هەرێمی کوردستان و قوباد تاڵەبانی جێگری، لەدوو لێدوانی جیادا، کابینەکەیان بە کابینەی چاکسازی و خزمەتگوزاری وەسفکرد.

سێ رۆژ دواتر، خانەنشینێکی 75 ساڵەی کابینەکە، بەهۆی مانەوەی بۆ ماوەیەکی درێژ لەسەرەی مووچە وەرگرتندا، گیانی لەدەستدا پێش ئەوەی مووچەکەی بە لێبڕینی لەسەدا 21 وە وەربگرێت.

خانەنشیان بۆ ئەوەی بتوانن بەزوویی مووچەکانیان وەربگرن، دەبێت لە بەرەبەیانەوە بێنە دەرەوە، گەرمای تاقەت پڕوکێن، رۆتیناتی ئیداری و نەشیاوی شوێنی دابەشکردن، لەبەرچاو نەگرتنی تەمەنی بەساڵاچوان، ئەوەندەی تر، خانەنیشیان دەخاتە بەردەم مەترسی گیانلەدەستدان.

جاری یەکەم نییە، کە خانەنشینێک لەپێناوی وەگرتنی مووچەکەیدا و لەچاوەڕوانیدا گیانلەدەستدەدات، ساڵانە چەندین ‌حاڵەتی لەمجۆرە تۆماردەکرێن، بەڵام بێ ئەوەی هیچ کاریگەرییەکی لەسەر بەرپرسانی حکومەت هەبێت بۆ چاککردنی پرۆسەی دابەشکردنی مووچە بەسەریاندا.

لەدۆخێکی وادا، هیچ کەس ولایەنێک بەرپرسیارێتی حاڵەتەکە هەڵناگرێت، تەنانەت بە کورتترین روونکردنەوەش، ئەوەش وایکردووە رووداوەکە تەنها لەچوارچێوەی هەواڵی ئاسایی میدیاکاندا بمێنێتەوە و هیچ کەس و بەرپرسێک لێپرسینەوەی لەگەڵدا نەکرێت.

هەواڵ

پەرلەمانی کوردستان دەخرێتەوە ژێر رەحمی چەکوشی دادگای فیدراڵی عێراق

دوو سکاڵا بۆ هەڵوەشاندنەوەی ئەم خولەی پەرلەمانی کوردستان لە دادگای فیدراڵی تۆمار دەکرێت، کە ئەنجامدانی هەڵبژاردنەکەی بە بڕیاری هەمان دادگا بووە.  

 هەڵبژاردنی خولی شەشەمی  پەرلەمانی کوردستان دوای دوو ساڵ دواخستن لە وادەی خۆی، دواجار بە بڕیاری دادگای فیدراڵی کۆتایی ساڵی رابردوو ئەنجام درا.

دادگای فیدراڵی بەشێکی چیرۆکی دواخستنی هەڵبژاردنی پەرلەمانی کوردستان بوو، نزیکەی ساڵێک تاتوێی سکاڵایەکی لەبارەی هەڵبژاردنەکەوە کرد، کە دواجار بە هەڵوەشاندنەوە و دواتر کەمکردنەوەی ژمارەی کورسی کۆتایی پێکهاتەکان کۆتاییهات.

ئێستا جارێکی دیکە ئەنجامی ئەو هەڵبژاردنە خراوەتەوە بەر دەستی دادگای فیدراڵی عێراق، کۆمەڵی دادگەری کوردستان و جوڵانەوەی نەوێ نوێ رایگەیاندووە، لە دادگای فیدراڵی سکاڵایان بۆ هەڵوەشاندنەوەی خولی شەشەمی پەرلەمانی کوردستان تۆمارکردووە.
سکاڵاکەی کۆمەڵی دادگەری کە یەکەم سکاڵایە بۆ هەڵوەشاندنەوەی خولی شەشەم لەلایەن عومەر گوڵپی کاندیدی سەرکەتووی حزبەکە دژی پەرلەمانی کوردستان تۆمار کراوە.

عومەر گوڵپى سەبارەت بە تۆمارکردنی ئەو سکاڵایە رایگەیاندووە،"داوامان لە دادگاى فیدراڵی کردووە، خولەکە هەڵوەشێندرێتەوە و هەڵبژاردن دووبارە بکرێتەوە، هەروەها هەموو ئەو ئیمتیازە ماددییانەى لە پێنج مانگى ڕابردوودا پەرلەمانتاران وەریان گرتووە، لێیان وەربگیرێتەوە".

کۆمەڵى دادگەرى کە لە هەڵبژاردنى خولى شەشەمى پەرلەمانى کوردستاندا سێ کورسیى بەدەستهێنا، دواتر هەڵبژاردنەکەی بە" دیزاینکراو" وەسفکرد و بڕیاریدا بایکۆتی خولەکە بکات.

دوای چوار رۆژ لە سکاڵاکەی کۆمەڵی دادگەری، جوڵانەوەی نەوەی نوێش رایگەیاند، سکاڵایان بۆ هەڵوەشاندنەوەی پەرلەمانی کوردستان تۆمار کردووە. 

نەوەی نوێ رایگەیاندووە، سکاڵاکەی ئەوان دژی سەرۆکی هەرێمی کوردستان، ئەوەیش بەهۆی ئەوەی تا ئێستا بڕیاری هەڵوەشاندنەوەی پەرلەمانی کوردستانی دەرنەکردووە.

ڕۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجام درا، بەپێی ئەنجامی کۆتایی هەڵبژاردن کە لەلایەن کۆمسیۆنەوە بڵاوکراوەتەوە، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، هەڵوێست 4 کورسی، کۆمەڵ 3 کورسی، بەرەی گەل 2 کورسی و هەریەک لە گۆڕان و هاوپەیمانی کوردستانیش یەکی کورسییەکیان بەدەستهێناوە.

دوای نزیکەی حەوت مانگ لە ئەنجامدانی هەڵبژاردن، تا ئێستا پەرلەمانی کوردستان کارا نەبووە و تەنها پەرلەمانتاران سوێندی یاسایان خواردووە، بەڵام هەموو مانگێک مووچە وەردەرگن.