تەندروستی

ئایا هەمیشە پلەی گەرمی ٣٦،٦ پێوەرە بۆ جەستەیەکی تەندروست؟

دکتۆر ئەلێکساندەر میاسنیکۆڤ ئاماژە بەوە دەکات کە پێوانەکردنی پلەی گەرمی جەستە دوای خواردن، دوای خۆشۆردن، چالاکیی جەستەیی یان دوای ئەوەی منداڵێک بۆ ماوەیەکی زۆر گریاوە، نادروستە.
دەشڵێت، هەندێک کەس بە بەکارهێنانی گەرمی پێوەرێکی ئەلیکترۆنی لە ژێر چەناگەدا پلەی گەرمی دەپێون، بەڵام باشتر وایە لە دەم و لە ژێر زماندا بیپێون، بەو پێیەی وردترە.
ئاماژەی بەوەشکرد، نابێت مرۆڤ پەلە بکات لە پێوانەکردنی پلەی گەرمی، چونکە ماوەی پێوانەکردنی پلەی گەرمی ژێر چەناگە بە گەرمی پێوی ئاسایی نابێت لە پێنج خولەک کەمتر بێت، هەروەها هی ئەلیکترۆنیش نابێت لە دوو خولەک کەمتر بێت دوای سیگناڵی دەنگی.
میاسنیکۆڤ پێی وایە پلەی گەرمی ٣٦.٦ هەموو کات جێگیر نییە، چونکە کاتێک پلەی گەرمی جەستە لە بەیانیاندا دەپێورێت ئەوە ٣٧،٢ دەبێت، ئەمەش شتێکی ئاساییە و دوای نانخواردنی نیوەڕۆش لەوانەیە بگاتە ٣٧،٧ و ئەمەشیان ئاساییە، بەڵام ئەگەر لەوە بەرزتر بێت، ئەوا دەبێت رێوشوێن بگیرێتەبەر بۆ کەمکردنەوەی.

هەواڵ

بۆ دواخستنی هەڵبژاردن دەچێتە تاران

پرسی دواخستنی هەڵبژاردنی پەرلەمانی کوردستان، نێجیرڤان بارزانی سەرۆکی هەرێمی کوردستان و جێگری سەرۆکی پارتی دیموکراتی کوردستان، ناچار دەکات روو لەتاران بکات و لەوێیەوە پرسەکە یەکلایی بکاتەوە.

بەگوێرەی زانیارییەکان، تائێستا ئێرانییەکان، هاوشێوەی کۆمەڵگەی نێودەوڵەتی و لایەنە ئۆپۆزسیۆنە ناوخۆییەکانی هەرێم سورە لەسەر ئەنجامدانی هەڵبژاردن لە 10 ئ حوزەیرانی ئەمساڵدا، بەڵام پارتی دیموکراتی کوردستان دەیەوێت هەڵبژاردنەکە جارێکی دیکە دوابخات.

بەرپرسانی پارتی، کورسی کۆتاکان و هەندێک کێشەی نەخوێندنەوەی پەنجەمۆری دەنگدانیان کردۆتە بیانوو بۆ ئەوەی بەشداری هەڵبژاردنەکە نەکەن و داوای دواخستنی بکەن، بەڵام خوێندنەوەی ئەوەی دەکرێت پارتی بەتەواوی ترسی لە ئەنجامی هەڵبژاردنەکە هەیە و پێیوایە زۆرینەی کورسییەکانی پەرلەمانی کوردستان لەدەستدەدات و ئەگەری زۆرە نەتوانێت سەرۆکایەتی حکومەت بەدەستبهێنێتەوە.

هەر ئەوەشە وایکردوە کە زیاتر لە هەفتەیەکە نێچیرڤان بارزانی کەوتۆتە جوڵە بۆ دواخستنی هەڵبژاردن و هەفتەی رابردووش لە بەغدا بوو، بەڵام ئەنجامێکی لەسەدا سەدی دەستنەکەوت.

رووی ئەمجارەی نێچرڤان بارزانی لە تارانە و دەیەوێت لەڕێگەی ئێرانییەکانەوە هەڵبژاردن دوابخات و رەزامەندی ئەوان بەدەستبهێنێت.

بڕیارە ئەمڕۆ یەکشەممە نێچیرڤان بارزانی بۆ ئەو پرسە بگاتە تاران و لەگەڵ بەرپرسانی باڵای ئەو وڵاتە کۆبێتەوە.

داوای دواخستنی هەڵبژاردنی پەرلەمانی کوردستان لەکاتێکدایە کە زۆربەی رێکخرا و لایەنە نێودەولەتی و ناوخۆییەکان داوای ئەنجامدانی دەکەن و دواخستنی بە مەترسی بۆ سەر هەرێم دادەنێن.